o Lick Dubois

o Lick Dubois si ne sínto piemontákero ke dživóla da le rik da Cannes. Jóu vjas-lo pro vélto maškarál da kolá Sínti Piemontakéri ke si-le da but berš kaj le Alpes Maritimes, an le Válči.

O Lick komensólas te bašavél ta gjavél kánte sas-lo pándra ternó. Jóu si ne ménčo ke kaméla but léskre Sínti.

Maškarál da sa le Rom ta le Sínti le Piemontákeri si-le písla. Da but berš o Lick déla lénge i vézla kun léskre giljá.
Jóu sibjardás nínge ne baró púxo (lívro) da pi but de štar šel lil ke rakaréla pro džibén romanó da le berš naklé. Ková púxo (lívro) karéla pes: "Scenes de la vie manouche - Sur les routes de Provence avec les Sintis Piémontais" (Editions Wallada, Châteuneuf-les-Martigues, 1998).

Do berš 1978 fin-a ko berš 1986 o Lick kerélas te ven pašál léste but Sinti, Manúš ta Kalé par te bašavéna ta gjavéna lésa an le gáu da Mougins ta Grasse.
Kolá patredžá sas-le kardé le "Nuits Tsiganes" (Romané Ratjá), ta sas čomóni da but šukár par sa kolá ke džánas-le an kolá rik koj di Côte d'Azur te šunéna len.

Si sémpar o Lick ke sibjardás o bašávimo "O Sínto" an i pelíkula "Le Gitan" da José Giovanni, kaj si an láte o Alain Delon ta i Annie Girardot.
An kajá pelíkula o Lick kerdás i rik do pral.